பிரதான் மந்திரி ஜன் தன் யோஜனா

கற்பனை செய்து பாருங்கள்: ஒவ்வொரு இந்தியனுக்கும், சமூகப் பொருளாதாரப் பின்னணியை பொருட்படுத்தாமல், அடிப்படை வங்கி வசதிகள் கிடைத்தால் எப்படி இருக்கும். இதுதான் பிரதான் மந்திரி ஜன் தன் யோஜனாவின் (பிஎம்ஜேடிஒய்) கனவு, இது அனைவருக்கும் நிதிசார் வசதி என்ற நோக்குடன் 2015இல் தொடங்கப்பட்ட ஒரு புரட்சித் திட்டம்.

இந்த லட்சியத் திட்டத்தின் முக்கிய விவரங்கள் இதோ.

பிரதான் மந்திரி ஜன் தன் யோஜனா திட்டம் அல்லது வெறுமனே ஜன் தன் யோஜனா என்றும் அழைக்கப்படும் பிஎம்ஜேடிஒய், ஒவ்வொரு இந்திய இல்லத்துக்கும் பூஜ்ஜிய இருப்பு சேமிப்பு வங்கிக் கணக்கு வசதியை வழங்கும் ஒரு முன்னோடியான அரசுத் திட்டம். இதன் விவரங்கள் இதோ

இந்தத் திட்டம், குறிப்பாக கிராமப்புற மற்றும் வங்கி வசதி இல்லாத பகுதிகளில் உள்ள மக்களுக்கு அதிகாரமளிக்கும் வகையில் வடிவமைக்கப்பட்டுள்ளது—இதன் மூலம் அவர்கள் பணத்தை திறம்பட நிர்வகிக்கவும், மின்னணு முறையில் பலன்களைப் பெறவும் முடிகிறது.

வரலாற்று ரீதியாக, மில்லியன் கணக்கான இந்தியர்கள் முறைசார்ந்த வங்கி வசதிகளைப் பெறவில்லை, இதற்குப் பதில் அவர்கள் பெரும்பாலும் இடரும் அசௌகரியமும் கொண்ட முறைசாரா அமைப்புகளை நம்பியிருந்தனர். இந்த இடைவெளியைக் குறைத்து நிதிக் கல்வியை ஊக்குவித்து இந்தியப் பொருளாதாரத்தில் முனைப்பாகப் பங்கேற்கும் ஆற்றலை குடிமக்களுக்கு அளிப்பதில் பிஎம் ஜன் தன் யோஜனா குறிப்பிடத்தக்க முன்னேற்றங்களைக் கண்டுள்ளது.

அனைத்து இந்தியர்களையும் உட்படுத்துகிற வகையில் நிதிச் சேவை வசதிகளை உறுதிசெய்வதே பிஎம்ஜேடிஒய் திட்டத்தின் முதன்மையான நோக்கம். அப்படியென்றால், அவர்களுக்கு வங்கிக் கணக்கு அணுகல், பணம் அனுப்பும் சேவைகள், கடன் வசதி, காப்பீடு, தங்கள் சேமிப்பை போட்டுவைக்க பாதுகாப்பான வழி ஆகியவற்றை வழங்குவதாகும். மக்களை முறைசார்ந்த நிதி அமைப்பிற்குள் கொண்டுவருவதன் மூலம், அவர்கள் தங்கள் நிதிகளை மேலும் நன்கு நிர்வகிக்கவும், உழைத்துச் சம்பாதித்த பணத்தைப் பாதுகாக்கவும், பல்வேறு அரசுத் திட்டங்கள் மற்றும் நிதிச் சேவைகளின் பலனைப் பெறவும் அவர்களுக்கு ஆற்றல் அளிக்க பிஎம்ஜேடிஒய் முனைகிறது.

கணக்கைத் திறக்கும் நடைமுறைகளை எளிதாக்குதல், வீட்டு வாசலில் வங்கிச் சேவைகளை வழங்குதல், நிதிக் கல்வி மற்றும் அரசு திட்டங்கள் குறித்து விழிப்புணர்வு ஏற்படுத்துதல், நிதிப் பரிவர்த்தனைகளுக்கு தொழில்நுட்பப் பயன்பாட்டை ஊக்குவித்தல் ஆகியவற்றின் மூலம் பிஎம்ஜேடிஒய் தற்போதுள்ள பல சவால்களுக்குத் தீர்வு அளிக்கிறது. இந்த முயற்சிகள் அனைவருக்குமான நிதிச் சேவையில் உள்ள இடைவெளியைக் குறைக்கவும், தனிநபர்கள் தங்கள் நிதிகளை மேலும் நன்றாக நிர்வகித்து அரசு சலுகைகளைப் பெற ஆற்றல் அளிக்கவும் முனைகின்றன.

பல இந்தியர்கள், குறிப்பாக கிராமப்புறங்களில் உள்ளவர்கள் அல்லது முறைசாரா துறையைச் சேர்ந்தவர்கள், குறைந்த அல்லது நிலையற்ற வருமானத்தைக் கொண்டுள்ளனர்.பூஜ்ஜிய இருப்பு நிபந்தனை துவக்க வைப்புத் தேவையின் தடையை நீக்குகிறது, இதனால் பிஎம்ஜேடிஒய் கணக்குகள் மக்களின் நிதி நிலைக்கு அப்பாற்பட்டு அனைவராலும் அணுக முடிகிறது. மேலும், முறைசார்ந்த வங்கி அமைப்புகளைப் பற்றி அறிமுகமில்லாத சிலருக்கு, குறைந்தபட்ச இருப்பைப் பராமரிப்பது குறித்த பயம் ஒரு தடையாக இருக்கலாம். பூஜ்ஜிய இருப்பு அம்சம் இந்தப் பயத்தை நீக்கி, பிஎம்ஜேடிஒய் திட்டத்தில் பங்கேற்பதை ஊக்குவிக்கிறது.

பிஎம்ஜேடிஒய் கணக்கைத் திறப்பது ஓர் எளிய செயல்முறை. நீங்கள் மிக அருகிலுள்ள வங்கிக் கிளைக்கு அல்லது நியமிக்கப்பட்ட வணிக நிருபர் (வங்கி மித்ரா) மையத்துக்குச் செல்லலாம். அடிப்படைத் தேவைகளில் செல்லுபடியான அடையாளச் சான்று மற்றும் முகவரிச் சான்று அடங்கும். உங்கள் விண்ணப்பம் சரிபார்க்கப்பட்டதும், உங்கள் பூஜ்ஜிய இருப்பு சேமிப்புக் கணக்குடன் இணைந்த ரூபே டெபிட் கார்டு உங்களுக்கு வழங்கப்படும். இந்தக் கார்டு ஏடிஎம்-களில் பணம் எடுக்கவும், கடைகள் மற்றும் ஆன்லைன் சில்லறை விற்பனையாளர்களுடன் ரொக்கமில்லா பரிவர்த்தனைகளைச் செய்யவும், அரசு சலுகைகளை நேரடியாக உங்கள் கணக்கில் பெறவும் உதவுகிறது. உதாரணமாக, ஓர் உட்கிராமத்தில் உள்ள விவசாயி தன் பயிர்களுக்கு அரசு மானியங்களைப் பெறுகிறார் என்று வைத்துக்கொள்வோம். பிஎம்ஜேடிஒய் கணக்கு மூலம், அவர்கள் பணத்தை மின்னணு முறையில் பெறலாம், இதனால் ரொக்கத் தொகை சார்ந்த இழப்பு அல்லது திருட்டுக்கான ஆபத்து நீக்கப்படுகிறது.

பிஎம்ஜேடிஒய், அல்லது பிரதான் மந்திரி ஜன் தன் யோஜனா, கணக்கு வைத்திருப்பவர்களுக்கு அது ஏராளமான பலன்களை வழங்குகிறது. பிஎம்ஜேடிஒய் பலன்களில் நிதிப் பாதுகாப்பு, சேமிப்புகளை டெபாசிட் செய்ய பாதுகாப்பான தளத்தை வழங்குதல், அதன் மூலம் நிதிப் பின்புலத்தை வழங்குதல் ஆகியவை அடங்கும். மேலும், கணக்கு வைத்திருப்பவர்கள் நேரடிப் பலன் பரிமாற்ற முறை மூலம் அரசு மானியங்கள் மற்றும் ஓய்வூதியம் போன்ற சலுகைகளை நேரடியாக தங்கள் கணக்குகளில் பெறும் வசதி கிடைக்கிறது.

மேலும், பிஎம்ஜேடிஒய் திட்டத்தின் கீழ் வழங்கப்படும் ரூபே டெபிட் கார்டு ₹1 லட்சத்திற்கான இலவச விபத்து மரண காப்பீட்டை அளிக்கிறது, இது கூடுதல் அடுக்குப் பாதுகாப்பை வழங்குகிறது. தகுதிபெற்ற கணக்கு வைத்திருப்பவர்கள் காலப்போக்கில் குறிப்பிட்ட தேவைகளுக்கான அதிகப் பணமெடுப்பு வசதியையும் பெறலாம். மேலும், பிஎம்ஜேடிஒய் சுலபமான, பாதுகாப்பான பரிவர்த்தனைகளுக்கு வசதிசெய்து தருகிறது, இதனால் கணக்கு வைத்திருப்பவர்கள் தங்கள் ரூபே டெபிட் கார்டு பயன்படுத்தி பல்வேறு கடைகள் மற்றும் ஆன்லைன் சில்லறை விற்பனையாளர்களிடம் ரொக்கமில்லா பேமென்ட்களை செலுத்த முடியும். இறுதியாக, பிஎம்ஜேடிஒய் கணக்கு வைத்திருப்பவர்கள் எதிர்காலத்தில் முறைசார்ந்த கடன் வசதிகளைப் பெறுவதற்கான ஒரு வழித்தடமாகச் செயல்பட முடியும், இதன் மூலம் அனைவருக்கும் நிதிச் சேவை மற்றும் ஆற்றலளிப்பு ஊக்குவிக்கப்படுகிறது.

பிஎம்ஜேடிஒய் மற்ற திட்டங்களிலிருந்து தனித்து நிற்கும் வகையில் தனித்துவமான அம்சங்களை வழங்குகிறது. முதலாவதாக, இது எல்லோருக்குமான வசதியை வழங்கி, வருமானம் அல்லது நிலவும் வங்கிக் கணக்கு நிலையைப் பொருட்படுத்தாது ஒவ்வொரு இந்தியக் குடும்பமும் இதில் பங்கேற்க முடியும் என்பதை உறுதிசெய்கிறது. இரண்டாவதாக, இது பூஜ்ஜிய இருப்பு கணக்குகளை வழங்கி, குறைந்தபட்ச இருப்புத் தேவை பராமரிக்கும் அவசியத்தை நீக்குகிறது. மூன்றாவதாக, அனைத்து பிஎம்ஜேடிஒய் கணக்குகளும் ரூபே டெபிட் கார்டுடன் இணைந்துள்ளன, இதனால் கணக்கு வைத்திருப்பவர்கள் ரொக்கமில்லா பரிவர்த்தனைகளை மேற்கொள்ளவும் ஏடிஎம்-களில் சௌகரியமாகப் பணம் எடுக்கவும் முடிகிறது.

மேலும், பிஎம்ஜேடிஒய் ஓர் இலவச விபத்து மரண காப்பீட்டை வழங்கி, எதிர்பாராத நிகழ்வுகள் ஏற்படும் பட்சத்தில் வாரிசுதாரருக்கு நிதிப் பாதுகாப்பை வழங்குகிறது. இறுதியாக, தகுதியுள்ள கணக்கு வைத்திருப்பவர்கள் குறிப்பிட்ட அளவுகோல்களைப் பூர்த்திசெய்த பிறகு அதிகப் பணமெடுப்பு வசதியை பெற முடியும், எனவே தேவைப்படும்போது அவர்களுக்கு கூடுதல் நிதி நெகிழ்வுத்தன்மை கிடைக்கும்.

பிஎம்ஜேடிஒய் சிறந்த அணுகலை வழங்குகிறது. குறிப்பிட்ட தகுதி அளவுகோல்களைக் கொண்ட சில திட்டங்களைப் போலன்றி, வருமான நிலை அல்லது நிலவுகிற வங்கிக் கணக்குகளுக்கு அப்பாற்பட்டு யார் வேண்டுமானாலும் பிஎம்ஜேடிஒய் கணக்கைத் திறக்கலாம். இது சமூகத்தின் மிகப் பின்தங்கிய பிரிவினரையும் அரவணைத்து நிதிச் சேவையை உறுதிசெய்கிறது, இதன் மூலம் அவர்கள் முறைசார்ந்த வங்கி அமைப்பில் நுழைவு பெற முடிகிறது. குறிப்பு: நீங்கள் ஒன்றுக்கு மேற்பட்ட பிஎம்ஜேடிஒய் கணக்குகளை வைத்திருக்கக் கூடாது.

பிஎம்ஜேடிஒய் கணக்கைத் திறப்பது ஒரு சிக்கல் இல்லாத செயல்முறை. பொதுவாக உங்களிடம் ஆதார் அட்டை, வாக்காளர் அட்டை அல்லது பேன் கார்டு போன்ற ஒரு செல்லுபடியான அடையாளச் சான்றும், ரேஷன் கார்டு அல்லது சேவை உபயோக பில்கள் போன்ற ஒரு முகவரிச் சான்றும் இருக்கவேண்டும். குறிப்பிட்ட தேவைகள் குறித்து வங்கி அல்லது அங்கீகரிக்கப்பட்ட பிரதிநிதி உங்களுக்கு வழிகாட்டுவர்.

பிஎம்ஜேடிஒய் கணக்கைத் திறப்பது சுலபம். உங்களுக்கு மிக அருகிலுள்ள வங்கிக் கிளைக்கு அல்லது நியமிக்கப்பட்ட வணிக நிருபர் (வங்கி மித்ரா) மையத்துக்குச் செல்லவும். அவர்கள் விண்ணப்பச் செயல்முறைக்கு உதவி தேவையான ஆவணங்களைப் பெற்றுக்கொள்வார்கள். உங்கள் விண்ணப்பம் சரிபார்க்கப்பட்டதும், உங்கள் கணக்கு திறக்கப்பட்டு உங்களுக்கு ரூபே கார்டு வழங்கப்படும்.

பிஎம்ஜேடிஒய் அடிப்படையில் பூஜ்ஜிய இருப்பு சேமிப்புக் கணக்குகள். எனினும், கணக்கில் இருக்கின்ற எதேனும் தொகைக்கு உங்கள் கணக்கு உள்ள வங்கியின் தற்போதைய சேமிப்புக் கணக்கு விகிதப்படி வட்டி கிடைக்கும். வட்டி விகிதங்கள் மாற்றத்திற்கு உட்பட்டவை.