તમારા પેટ અને ખિસ્સા માટે હળવી એવી હેલ્ધી ભોજનની વાનગીઓ

ઝડપી જીવનશૈલી જીવવાથી તમને બેસીને ભોજન કરવા માટે બહુ ઓછો સમય મળે છે. આનો અર્થ એ છે કે તમારે જંક ફૂડ અને ફાસ્ટ ફૂડ પર જીવવું પડે છે, જે તમારા સ્વાસ્થ્યને અસર કરે છે અને તબીબી બીમારીઓને જન્મ આપી શકે છે.

સ્વસ્થ આહાર આ સમસ્યાને ઉકેલી શકે છે. ના, એનો અર્થ એ નથી કે તમારે કલાકો રસોડામાં વિતાવવા પડશે અથવા સુપરમાર્કેટમાં જઈને મોંઘી અને દુર્લભ સામગ્રી ખરીદવી પડશે. તમે સરળતાથી એવું ભોજન બનાવી શકો છો જે તમારા ખિસ્સા માટે જેટલું હળવું હોય તેટલું જ તમારા પેટ માટે પણ હોય.

પછી ભલે તમે ટિફિનમાં પેક કરવા માંગતા હોવ, ઘરે ડિનર કરવા માંગતા હોવ, અથવા બજેટમાં વજન ઘટાડવા માટે ફક્ત હેલ્ધી વાનગીઓ શોધી રહ્યા હોવ, અમે કેટલીક સરળ રેસીપીની યાદી આપી છે જે તમે અજમાવી શકો છો.

જો તમે ઓછા બજેટમાં વજન ઘટાડવા માટે હેલ્ધી વાનગીઓ શોધી રહ્યા છો, તો નાચની ઢોસા તમારા માટે યોગ્ય છે. તેમાં ખૂબ જ ઓછી સામગ્રીની જરૂર પડે છે જે રસોડામાં સરળતાથી મળી રહે છે. નાચની ઢોસા બનાવવા માટે, નાચની અથવા રાગીને ધોઈને આખી રાત પાણીમાં પલાળી રાખો. સવારે પાણી કાઢી નાંખો અને રાગીને પીસીને સ્મૂધ પેસ્ટ બનાવો. પીસતી વખતે થોડું પાણી ઉમેરી જરૂરી ઘટ્ટતા મેળવી લો.  હવે, તેમાં બારીક સમારેલી ડુંગળી, કોથમીર, મીઠું, લીલા મરચાં અને લસણની પેસ્ટ ઉમેરો અને સારી રીતે મિક્સ કરો. ઢોસાનો તવો અથવા કોઈપણ નોન-સ્ટીક તવો ગરમ કરો અને તેના પર થોડું તેલ લગાવો.જ્યારે તવો પૂરતો ગરમ થઈ જાય, ત્યારે તવા પર એક કડછી ખીરું રેડો અને કડછીને ગોળ ફેરવીને પાતળો ઢોસા બનાવો. ઢોસાને બંને બાજુથી ગોલ્ડન બ્રાઉન થાય ત્યાં સુધી શેકો. ફુદીનાની ચટણી સાથે ગરમાગરમ પીરસો.

આ હેલ્ધી અને પૌષ્ટિક મલ્ટિગ્રેઇન રોટી ૫ હેલ્ધી ભારતીય અનાજ: જુવાર, બાજરી, બેસન, ઘઉં, રાગી (અથવા નાચની) થી બનાવવામાં આવે છે. તે આયર્ન, પ્રોટીન, વિટામિન બી અને ફાઇબરથી ભરપૂર છે. મલ્ટિગ્રેઇન રોટી બનાવવા માટે, પાંચેય લોટ (૧\૪ કપ દરેક) ને બારીક સમારેલી ડુંગળી, લીલા મરચાં અને કોથમીર સાથે એક ઊંડા મિક્સિંગ બાઉલમાં ભેળવો. એક ચપટી હળદર પાવડર, થોડું લાલ મરચું પાવડર અને સ્વાદ મુજબ મીઠું ઉમેરો. તેને પાણી વડે મસળી ને નરમ કણક તૈયાર કરો. કણકને નાના ભાગોમાં વહેંચો. એક સમયે એક નાનો ભાગ લો અને તેને રોલિંગ પિનનો ઉપયોગ કરીને ચપટો કરો. હવે ચપટી રોટીને ગરમ નોન-સ્ટીક તવા પર મૂકો અને બંને બાજુથી ગોલ્ડન બ્રાઉન થાય ત્યાં સુધી શેકો. દાળ અથવા તમારી પસંદગીની ગ્રેવી સાથે પીરસો.

૧/૪ કપ મગની દાળ ધોઈને ૩૦ મિનિટ પાણીમાં પલાળી રાખો. પ્રેશર કુકરમાં તેલ ગરમ કરો અને તેમાં જીરું, હિંગ ઉમેરો અને એક મિનિટ માટે રહેવા દો. હવે, ડુંગળી અને લીલા મરચાં ઉમેરો અને બીજી મિનિટ માટે સાંતળો. તેમાં આદુ-લસણની પેસ્ટ, મરચું પાવડર, હળદર પાવડર ઉમેરો અને ધીમા તાપે સાંતળો. ૧ કપ ઓટ્સ, મગની દાળ અને તમારી પસંદગીના શાકભાજી (ફણસી, ગાજર, કેપ્સિકમ, વટાણા) ઉમેરો.  તેને સારી રીતે મિક્સ કરો અને ૨-૩ સીટી થાય ત્યાં સુધી પ્રેશર કુક કરો. ત્રણ કપ ગરમ પાણી અને સ્વાદ મુજબ મીઠું ઉમેરો. તેને સારી રીતે મિક્સ કરો અને પ્રેશર કુક કરો. પ્રેશર કુકરમાંથી વરાળ નીકળી જાય પછી તરત જ ગરમા ગરમ પીરસો.

સવારની વ્યસ્તતા વચ્ચે નાસ્તા માટે સ્ક્રેમ્બલ્ડ ઈંડા બજેટ-ફ્રેન્ડલી અને હેલ્ધી ભોજનનો એક શ્રેષ્ઠ વિકલ્પ છે. તેમાં પાલક ઉમેરીને તેને વધુ હેલ્ધી બનાવી શકાય છે, જે પોષક તત્વોથી ભરપૂર હોય છે અને તેમાં ચરબી અને કોલેસ્ટ્રોલનું પ્રમાણ ઓછું હોય છે. આ પ્રોટીનથી ભરપૂર નાસ્તો બનાવવા માટે, મધ્યમ-ઉચ્ચ આંચ પર એક મોટો તવો ગરમ કરો અને તેને થોડું તેલથી ગ્રીસ કરો. વાયર વ્હિસ્કની મદદથી ૪-૫ ઈંડાને ફેંટો, પછી તેમાં ૨ ચમચી દૂધ અને ત્યારબાદ મીઠું અને કાળા મરીનો પાવડર ઉમેરો. મિશ્રણને સારી રીતે ફેંટો અને તેને તવા પર રેડો અને તે શેકાતું હોય તે દરમિયાન તેને સતત હલાવતા રહો. જ્યારે ઈંડા આકાર લેવા લાગે ત્યારે તવામાં મુઠ્ઠીભર સમારેલી પાલક ઉમેરો. ઈંડા વહેતા બંધ થાય ત્યાં સુધી ૨ મિનિટ વધુ રાંધો. હૉલ-ગ્રેઇન ટોસ્ટ સાથે પીરસો.

તમે રેસીપીમાં તમને ગમે તે કંઈપણ ઉમેરી શકો છો, પરંતુ યાદ રાખો કે તેલનો ઉપયોગ ઓછામાં ઓછો કરવો. આ બધી રેસીપી એકદમ સરળ છે અને તમને બજેટમાં હેલ્ધી ખોરાક લેવામાં મદદ કરી શકે છે.